Nike og Össur í samstarf
Stoðtækjaframleiðandinn Össur og íþróttavörufyrirtækið Nike hafa leitt saman hesta sína við framleiðslu og hönnum á skósóla á gervifætur sem aflimaðir íþróttamenn nota. Verkefnið er unnið í samvinnu við heimsmeistara í þríþraut aflimaðra, Söruh Reinertsen. Hún kom hingað til lands á síðasta ári. Verkefnið hefur því fengið nafnið „Skósól Söruh“.
Verkefnið er einstakt, er haft eftir Tobie Hatfield, nýsköpunarstjóra hjá Nike í fréttatilkynningu. Skósólinn er dæmi um verkefni sem mikil ástríða hafi verið lögð í, fötluðum íþróttamönnum til heilla.
Þá er haft eftir forstjóra Össurar, Jóni Sigurðssyni, að gervifótur Össurar, sem kallast Flex-Run hjálpi fötluðum íþróttamönnum að ná markmiðum sínum. Samstarfið við Nike og Reinertsen tryggi forystu í stoðtækjum sem þessum þar sem mikil þekking og þróun liggi að baki.
Reinertsen missti fótlegg við hné vegna veikinda þegar hún var sjö ára. Hún hefur ekki látið það hindra sig við að verða afreks íþróttamaður.
Sarah Reinertsen var fyrsta aflimaða konan til að ljúka Ironman keppni og hún hefur aðstoðað við þróun og mun kynna nýja sólann.
mbl | 2.2.2012 | 14:28
Origin: mbl
Sjá nánar hér : http://ossur.com/flex-run